سواء الميكروباص

وأنا رايحة شغلي الصبح , شاورت لميكروباص وسألته طالع ف وق الكوبري ياسطى, قالي أيوة, فاركبت معاه, وبعدين اكتشفت انه مش طالع فوق الكوبري ولا حاجة وكان بيقولي كده وخلاص عشان أركب معاه وياخد فلوس, والحكاية ده بقى بتحصل كتير أوي, سواء الميكروباص يستعبط ويقول أيوة طالع فوق الكوبري وهو مش طالع, ويقولك بقى ايه الزبون ركب خلاص و هيطنش ومش هيقولي حاجة وهينزل تحت الكوبري ويبقى يمشى شوية مش مشكلة

حسبي الله ونعم الوكيل

صاحب الشركة

صاحب الشركة نصاب بياكل حقوق الموظفين, سألته اذا كان ينفع آخد أجازة ولا لأ

قالي ينفع وليكي أجازة 21 يوم

أخدت 6 أيام أجازة وسافرت أسوان وانبسطت , وبعد ما رجعت لقيت صاحب الشركة بيقولي انت هيتخصم منك ال6 أيام عشان انت مالكيش أجازات

نعم؟؟؟؟

مليش أجازات؟؟؟؟؟؟؟؟؟

يعني إيه؟؟؟؟؟

قالي أصل حصل غلطة وانت كنت سبتي الشركة فترة ورجعتي تاني اذا ملكيش أجازات

واحنا أصلنا مخدناش بالنا

طب لو كنت قولتلي الكلام ده من الأول مكنتش خدت أجازة عشان ميتخصمش مني حاجة, لكن تقوللي ليكي أجازة و بعدين تخصملي , كدة يبقى ظلم, واللي مسؤول عن الغلطة هو اللي لازم يتحمل الغلطة ده مش أنا

فيقوللي ايه النصاب, معلش مش مشكلة مش خنصمهم مرة واحدة هنخصمهم حبة حبة

ده موقف من مواقف النصب لكن في حاجات كتيرة تانية بتحصل مع زمايلي في الشركة وبتبين أد إيه الراجل ده نصاب

وحسبي الله ونعم الوكيل

نصابين في كل حتة

في كل مكان وفي كل مجال بقابل نصابين, النصابين كتروا أوي, الدكتور نصاب وصاحب الشركة نصاب وسواء الميكروباص نصاب وسواء التاكسي نصاب والسواء الخصوصي كمان نصاب, والبواب نصاب والراجل اللي بيصلح الدش نصاب, والكوافير نصاب...............وإلى آخره

هو ليه كدة الناس بقى سهل عندها أوي انها تاكل حقوق ناس تانية

طب العيب في ايه بالظبط

العيب في إن مبقاش القانون بيجيب لحد حقه ومفيش نصاب بيتعاقب فالناس كلها بقت تستسهل تنصب , ولا العيب في التعليم وإن الناس متعلمتش إن النصب حرام وأكل حقوق الغير حرام

أنا ساعات من كتر ما شفت نصابين بحس إن الناس بقت فاهمة إن النصب ده ميزة مش عيب وإن النصب صفة حميدة والنصاب ده يبقى واحد شاطر وفهلوي

يا رب ارحمنا من النصابين